“Олоҥхо эйгэтэ баарын тухары“

Олоҥхо тыйаатырын үлэһитэ, РФ суруналыыстарын Сойууһун чилиэнэ Майя Власьева сахалыы сурук-бичик күнүгэр “Олоҥхо эйгэтэ баарын тухары...” телевизионнай биэриитэ күн сирин көрдө. Биэриигэ сахалартан бастакы тыл үөрэхтээҕэ, сахалыы маассабай суругу-бичиги төрүттээбит бастакы учуонай-лингвист, уопсастыбаннай диэйэтэл С.А. Новгородов фольклорист быһыытынан наукаҕа үтүөтэ сырдатыллыаҕа. Маны таһынан, олоҥхоһут И.Г. Теплоухов-Тимофеев “Куруубай хааннаах Кулун Кулуустуур” олоҥхото суруллубута 115 сылын, академик Э.К. Пекарскай редакциятынан “Образцы народной литературы якутов” серияҕа бэчээттэнэн тахсыбыта 105 сылын, олоҥхоһут М.Т. Шараборин-Кумаров төрөөбүтэ 155 сылыгар туруоруллар “Улуу Даарын” испэктээк туһунан, олоҥхоһут П.П. Ядрихинскай төрөөбүтэ 120 сылын, бөдөҥ фольклорист Н.В. Емельянов төрөөбүтэ 100 сылын туһунан биэриигэ сюжеттэр киирдилэр. Биэриигэ Олоҥхо тыйаатырын бар дьоно ийэ тылга сыһыана, үбүлүөйдээх олоҥхоһуттар айымньыларын ситиһиилээхтик туруора сылдьара сырдатылынна. Биэрии продюсера - М. Турантаева, биэрии бырайыагын ааптара - М. Власьева.