Түркия: кыргызстандык куткаруучулар урандыдан 19 сөөктү алып чыгышты

Кыргызстандык куткаруучулар Түркиянын улам-улам зилзала болгон Кахраманмараш аймагындагы издөө иштери учурунда уранды алдынан 19 адамдын сөөгүн алып чыгышты. Бул туурасында ӨКМдин маалымат кызматынан кабарлашты. Кадрлардан куткаруучу адистерден тышкары үйрөтүлгөн иттердин уранды арасында кызмат өтөп жүргөнүн көрүүгө болот. “Сөөктөрдү таңкы саат 4:50дө алып чыгышты. Издөө иштери 24 саат бою үзгүлтүксүз уланууда“, — деп айтылат билдирүүдө. Алар Түркияга келген башка куткаруучулардын катарында зилзаланын кесепетин жоюу, адамдардын өмүрүн сактап калуу аракеттерин көрүүдө. Кыргызстандык куткаруучулар 67 адамдан турат, курамында фельдшерлер, психолог, кинологдор бар. Эске салсак, 2023-жылдын 6-февралынын таңында Түркиянын түштүк-чыгышында магнитудасы 7,7ге жеткен зилзала болгон. Түш ченде кайра кайталанган. Мамлекет башчысы Режеп Тайип Эрдогандын айтымында, бул 1939-жылдан берки эң күчтүү жаратылыш кырсыгы болуп калды. Соңку маалыматтарда 12 391 адам каза таап, 62 914 киши жаракат алганы айтылды.