Trīs kalēndiskas gērbas

“Trīs kalēndiskas gērbas“. Teikātan be sendētan pra Twānkstas Pēran Skaitāi: Alnā Muzīki: Āulaukis Supnagrāfiki: Warāi zmānes gērba, kāi en Kalēndan Kaūkas bētan preipalla arwjai stebulāi. En 12 stūndins appis, azarāi be wisāi undas appus pastānja saldāi kāigi meddu anga mazzi wīrstwei en wīnan, adder tēr en aīnan minūtin. Tēt dīgi en Kaūkas bētan pekku pagaūnja waitjātwei sen zmāneniskan tārin. Staddan mes mazzimai waīstun wissans kliptans be wisawīdiskans āustabawingins waīstins. 1. „Wāiks Kāits be stebbuls aps“. Aīnan rēizan aīns labs, dēlawingis wāiks bilīts Kāits šlūziwuns prei stawīdan lāiman ljūdjan. En ljūdjas buttu Kāitu ni bēi deīktan, stesse paggan tāns migēi en staldu sen pekku. En aīnan Kalēndan Kaūkas bētan bēi spārts saltan. Be stas wāiks ni mazēi enmigītwei passalas paggan. Niggeistai tāns kīrdi, kāigi klenti gērdaui Ik as ni būlai preiristā, staddan mazzais as izpūlai wīnan iz appun. Kāits kirdēi stan be izbēguns prei appun. Gardauwuns tāns undan iz appun - arwis wīns! Gardus be salds! 2. „Gurīns Makkis be kāigi peningāi degga en Kalēndans“. Kittan rēizan bēi stawīds zmānenawins bilīts Makkis.Tāns buwinna pawārgewingiskai en ainasmu Sūdawas sadellju prei meddjan. En Makkjas sēimjai bēi tūlan malnīkai, adder wissan ka Makkis turēi iz pekku bēi tēr klenti, klubā kaīwi be kamistjan. Perēit Kalēndan Kaūkas bētan, adder na Makkjas stallan lānza tēr kukkeljai, tlākjas daddas skīwi be silliki. En naktin Makkis etbudda gaddas paggan. Kwaitēi izpūtun undan, adder wumbarāi bēi paustāi. Ēit tāns prei appun. En padwarrju mēniks swāiksti, snāigs gurga. Makkis knēipja wūmbaran undas be biskin bēi gēruns. Nū kawīdan saldiskan, kawīdan gardiskan! Sta bēi arwis wīns. Niggeistai tāns kīrdi, kāi en staldu ainuntkawīda burbelausna. Be tāns mēri anga ainunts stwen enlēzi prei tenesse pekku en staldan. Be ēit dirītun. Tāns preidāi swāise akkin prei prāljan be wīda, kāi pekku krāmta kraīsan be waitjāi sirzdau sin sen zmāneniskan tārin. Klenti gērdaui Nūss ljūdis ast labs, adder spārtai sentēnsts pra naūtins be gurīniskan. Kamistjan suppa sen galwan jā, jā, jā... Klubā kaīwi engērdawusi, kāi ljūdis ni astits wīngars, beggi eraīnan Kaūkas bētan per pīrtin prei stabban peningāi degga, adder tāns ni mazzi izkaptun dins. Makkis bēi dirīwuns be arwiskai tēt per pīrtin degga pannus suls. Makkis imma lāptan be bēga prei stan stabban. Izkappuns stwen tūlan penningans. Nū staddan pagaūwa tāns labbai giwītwei! Kāupi tūlan zemmin, zēidi nawwan buttan... Wisāi buttas zmānes austēmba - nū kāigi preipalla stawīdan stebbulan, kāi en aīnan dēinan Makkis iz gurīnan pastāi per rikijjan. Tāns dabber giwīja ilgai be deiwūtiskai, adder pirzdau aulaūjantjai tāns perwākau swāise gennan be iztarēi En Kaūkas bētan peningāi degga, tū nadirēis... 3. „Stebbuls snāigs en Kalēndans“. Kittan rēizan aīns ljūdis bilīts Medīks en Kalēndan Kaūkas bētan augūbi en meddjan medjātun sasnjans. Tāns aupalla en meddju labban deīktan be sīnda prei berzin. Tenesmu sīndantjai wīlkai pagaūwa kāuktwei iz wissans pāusans be wis taūwais be taūwais. Medīks bijāwuns enlēzi na berzin. Sīnda be dirēi. Perbēga tūliskan wīlkai, senrīnka si en stesmu deīku, aūktai erlāngi galwans be pagaūwa kāuktwei. Be staddan pagaūwa snigtwei, snēigt sen zirnins, tusnai, tusnai. Adder wīlkai kāigi pagaūwa lāizitun dins, tēt be lāizi, tēt be lāizi! Medīks sīndants na garrjan ni turēi ka dēlatun. Palāizi tāns dīgi stans snāigas zirnins, kawīdas krūwa tenesmu na pīrstinins. Nū kawīdas gardjas bēi stās snāgegas, ni ast niainā stawīda ēda en swētu, kāi būlai garduisi! Kaddan wīlkai izsklaitinna si, Medīks lēzuns zemmai iz garrjan, etwartinna si en buttan. Adder wissans trīns Kalēndan dēinans tāns ni kwaitēi ēstun - bēi stawīds sātus ikāgi būlai ēduns tūliskan tēr deiwāi waīda kawīdans stebbulans ēdans.