Дзæуджыхъæуы цæуы “Æрыгон специалист — фидæны аразæг“ форум

Стыр комплекс, спортивон центртæ, айти-клубтæ. Ныртæккæ фæсивæд æрмæст 3D объекттæ нæ аразынц. Кусынц сæ царды аив нывтыл. Ахуырдзаутæн радтой хæслæвæрд сæ регион фæхуыздæр кæнын æмæ ногдзинæдтæ æрхъуыды кæнын. Хуыздæр командæ райсдзæн лæвар ахуырад Мæскуыйы Технологон Институты. Скъоладзаутæн æрмæст конкурс нæу, фæлæ фидæнмæ ахсджиаг къахдзæф равзарыны гæнæн. Студенттæн сæ хæслæвæрдтæ зындæр сты. Уыдон аразынц туристон объекттæ. Уый æнцон хъуыддаг нæу. Алцыдæр хъæуы лыстæг равзарын: концепци, бынатæвæрд, æмгъуыд, лæггæдты хыгъд. Сæйрагдæр та хи проекты хъуыды. Форумы куыст алкæмæндæр фаг ис. Ногдзинæдтæ райсын рауад рауад суанг магистратурæйы студенттæн дæр. Фæзтæй иуыл - студентты фембæлд вице-премьеримæ, республикæйы арæзтады министрады разамонæгимæ. Æмбырды хуыз - “25 фарсты министрæн“. Атараты Георгий фыццаджыдæр фæнысан кодта: фæрсут мæ куыд бæрнон адæймаджы нæ, фæлæ куыд уæ хистæр хæлары. Æмæ ныхас æцæгдæр рауад цымыдисаг æмæ хъæрмуд. Фидæны аразджытæм хуымæтæг фæрстытæ нæ уыд, фæлæ сæм разынд нырыккон горæтты рæстæджы домæтимæ арæздтæты хъæппæристæ. Фæлладуадзæн бынæтты æмæ горæтаг инфраструктурæйы æндæр объектты тыххæй хъуыдытæ. Кæцыдæртæ дзы вице-премьеры зæрдæмæ уайтагъд фæцыдысты. Хæххон металлургон институты арæзтадон цард райдыдта 1958-æм азы. Уыцы рæстæгмæ университет бацæттæ кодта 6 мин специалисты. Ректор Хъамболты Дзамболат куыд дзуры, афтæмæй “Истори тынг хорз рауад, фæлæ хъæуы ног фыссын“. Хорз райдиан та йын сси “Æрыгон специалист - фидæны аразæг“ форум. Куысты бынæтты армукъа, егъау аразтадон компаниты минæвæрттимæ фембæлдтытæ, конкурстæ æмæ дæсныйадæвдисæг ахуыртæ. Æппæт ацы мадзæлттæ профессийы кад бæрзонддæр кæнынц, разæнгард æм кæнынц æрыгон адæмы. Уыимæ ма фæзыны кадрты резерв. Форум иумæйагæй сарæзтой Уæрæсейы арæзтады министрадимæ, уыимæ ма бæстæйы дзуапдæттæг ведомствойы ахуырады компетенциты æмæ кадрты центримæ.