БАЛАЛАР ҚАУІПСІЗДІГІН ҚАМТАМАСЫЗ ЕТЕТІН ЖОЛ КАРТАСЫ ТАНЫСТЫРЫЛДЫ

Қалада оқушылар мен балабақша тәрбиеленушілерінің саны 30 мыңнан асады. Олардың қауіпсіздігі басты назарда болып отыр. Директорлар кеңесінде бұл тақырып та әңгіме өзегіне айналды. Қала әкімінің қатысуымен жиында арнайы жол картасы таныстырылды. Мектеп, балабақша директорлары жол картасындағы басым бағыттарға тоқталып, арнайы жоспар негізінде жұмыс істеді. Бүгінде бұл құжат 5 бөлімнен тұрады. Директорлар кеңесінде лаңкестікке қарсы, азаматтық қорғаныс және ақпарат қауіпсіздігіне де тоқталды. Мәселен, қала мектептерінде СКУД жүйесі жұмыс істеп келеді. Бұл құрылғы балалар қауіпсіздігін сақтауға мүмкіндік береді. Сондай-ақ, бейнебақылау жүйесінің пайдасы туралы да айтылды. Бүгінде қала мектептеріндегі камералар саны 1 мың болса, 300-ден астамы балабақшаларда орнатылған. Шаһар жетекшісі Марат Тасмағанбетов ескірген камералардың орнына жаңаларын сатып алуды тапсырды. Төтенше жағдай бола қойған жағдайда арнайы дабыл қоңырау жұмыс істеу қажеттігі туралы да айтты.