Առաջին անգամ կներկայացվի արհեստական բանականության կողմից ստեղծված պիես

«Արմմոնո» միջազգային թատերական փառատոնի տնօրեն Մարիաննա Մխիթարյանը Sputnik Արմենիայի հետ զրույցում անդրադարձել է նոյեմբերի 28-ից դեկտեմբերի 4-ը Երևանում կայանալիք «ԱրմմոնոPlus» միջազգային թատերական 8-րդ փառատոնին՝ նշելով այս տարվա կարևորագույն նորամուծությունները։ Դրանցից առաջինը՝ «ԱրմմոնոPlus»-ը դարձել է միջազգային, երկրորդը՝ հայ թատերասերներին առաջին անգամ կներկայացվի արհեստական բանականության օգնությամբ հայ հեղինակի կողմից ստեղծված պիես։ Տնօրենն ուրախ է, որ փառատոնը նոր մոնոներկայացումներ ստեղծելու խթան է հանդիսանում։ «Հայ թատրոնին բնորոշ են համաշխարհային խնդիրներ, որոնք մենք դարձնում ենք մերը, ազգայինը», - ասում է Մարիաննա Մխիթարյանն ու հավելում, - «Հայկական ներկայացումները թե՛ շատ ազգային են, թե՛ համաշխարհային»։ Մխիթարյանը կիսվեց նաև դերասանական կարիերայում ներկա դադարի, կանացի լինելու և ամեն ինչ հասցնելու իր գաղտնիքներով։