Тааттаҕа «Күүлэй 2023» өрөспүүбүлүкэтээҕи күрэххэ хотуурдар тыаһаатылар

Өбүгэ саҕаттан кэлбит илии хотуурунан охсууну көҕүлүүр сыаллаах аһаҕас өрөспүүбүлүкэтээҕи «Күүлэй 2023» күрэх “Сахабэчээт” уонна Таатта улууһун дьаһалтатын өйөбүллэринэн ыытылынна. Бу үлэ бырааһынньыгын Уолба нэһилиэгэр Хайа анна диэн алааска тэрийдилэр. Күрэхтэһии хайдах ааспытын, видеотыгар салҕыы көрүҥ. Аатырбыт стахановец Алексей Иванович Кладкин 1938 сыллаахха биир күҥҥэ 5,16 гааны илиинэн охсон, рекорду олохтообута. Ол көрдөрүү 85 сылыгар итиэннэ «Уолба» тыа хаһаайыстыбатын кэпэрэтиибин дириэктэрэ Николай Николаевич Соломонов кэриэһигэр аналлаах илиинэн охсууга аһаҕас өрөспүүбүлүкэтээҕи күрэхтэһии түмүктэннэ. Хайа анна диэн алааска Амма, Нам уонна Таатта улуустарыттан кыттааччылар күөн көрүстүлэр. Кинилэр 4 көрүҥҥэ илин-кэлин түһүстүлэр. Ону таһынан дьүүллүүр сүбэ түмүк таһаарар кэмигэр ким баҕалаах элитиэпкэ хотуурунан охсууга күрэхтэстилэр. Отчуттар 4 чаас тухары биир кэлим илии хотуурунан уонна мотокосанан от охсон, маннык түмүк буолла: илии хотуурунан охсууга 45 саастарыгар диэри эр дьоҥҥо 1 миэстэҕэ Нам улууһуттан Үөдэй нэһилиэгиттэн сылдьар Леонид Зырянов таҕыста. 46 сааһыттан үөһээ аҕам саастаах охсооччуларга 1 миэстэҕэ Таттта улууһун Үөдэйиттэн Афанасий Собакин бастаата, 18 саастарыттан үөһээ эр дьоҥҥо мотокосанан охсууга Уолба олохтооҕо Денис Егоров кыайда, оттон дьахталларга Амма Эмис нэһилиэгиттэн сылдьар Матрена Тимофеева кыайыы өрөгөйдөннө. Элитиэпкэ хотуурунан охсууга дьахталларга Александра Тимофеева уонна эр дьоҥҥо кини аҕата Авдей Тимофеев кыайдылар. Санатан эттэххэ, Алексей Кладкин аатынан күрэхтэһии бүтэһигин 2009 сыллахха Тааттаҕа Ытык Күөлгэ ыытыллыбыт. Быйылгы күөн көрсүһүүгэ кылаабынай бирииһи - убаһаны уонна атын сыаналаах бириистэри «Сахабэчээт» судаарыстыбаннай автономнай тэрилтэ уонна Таатта улууһун дьаһалтата туруордулар. Маны таһынан элбэх спонсордар кыттыһаннар, күрэхтэһии бирииһин уопсай суумата 600 тыһ. солк. тэҥнэстэ. Бу улахан таһымнаах өрөспүүбүлүкэтээҕи күрэҕи Уолба олохтоохторо уонна дьаһалтата үрдүк таһымҥа тэрийдилэр. Күрэхтэһээччилэр сыалларын ситиһэн, кыахтарын холонон, үөрэн-көтөн тарҕастылар. Салҕыы видеоҕа көрүҥ. Музыка: Виталий Очиров - Дьөһөгөй фонк 103 бөлөх - һыттыа-һыттыа Марина Попова - Таатта #сахасирэ #күүлэй