«Атăл» стадиона маларах туса пĕтересшĕн

Шупашкарти «Атăл» стадион Чăваш Ен строителĕсен ятне çӳле çĕклеме пултарĕ. Спорт объектне паха çеç мар, палăртнинчен маларах та туса пĕтересшĕн. Хальлĕхе ĕçсен 83 процентне пурнăçланă. Унти ĕç-хĕлпе Чăваш Ен Пуçлăхĕ Олег Николаев паллашрĕ. 2 спорт залĕ, 2 бассейн, 3 тренажер лапамĕ, хăна çурчĕ тата ытти те. «Атăл» стадион куç умĕнчех улшăнса пырать. 14 пин тăваткал метр лаптăкра физкультурăпа сывлăха çирĕплетмелли комплекс, пăр катокĕ, футбол уйĕ вырнаçнă. Вĕсенче пĕр харăсах 500-е яхăн çын вăхăта усăллă ирттерме пултарать. Килĕшӳ тăрăх спорт объектне 2024-мĕш çулта раштав уйăхĕн 25-мĕшĕнче туса пĕтĕрмелле. Телее, «Атăл» стадионăн алăкĕсем маларах та уçăлма пултараççĕ. – Эпир пăхса тухрăмăр ĕнтĕ. Ĕçсене вăхăтра кăна мар, паха кăна мар тата тĕрлĕ енлĕ çĕнĕ дизайн мелĕсемпе хитрелетсе, лайăхлатса туса пыни татах та савăнтарать. Паллах, çакăнта çынсене питĕ хăтлă пулать, ман шутпа, спортпа туслă пулма та, çакăнта килсе канма та. Хальхи вăхăтра пăр керменĕнче, футбол вылямалли уйра хĕрӳ ĕç пырать. Вĕсемпе пĕр танах тавралăхне те хăтлăлатаççĕ строительсем. Малашне спорт комплексĕ тĕрлĕ шайри ăмăртусене йышăнма та пултарĕ.