БӨТӘ ДОНЪЯ ШИҒРИӘТ КӨНӨ

#Всемирныйденьпоэзии #Шиғриәткөнө 21 МАРТ – БӨТӘ ДОНЪЯ ШИҒРИӘТ КӨНӨ Асҡар китапханаһы ойошторған сара матур сара беренсе һанлы Асҡар мәктәбенең 8 “В“ класында үтте. - ҺЕҘ ИЖАДЫҒЫҘҘА НИНДӘЙ ТЕМАҒА ӨҪТӨНЛӨК? - Әлбиттә, бар шағирҙар ҙа тыуып үҫкән төйәгенә бағышлай. Мин Ирәндек, Ҡырҡты тауҙары, Ҡыҙыл йылғаһы, бала-сағым уйнап үҫкән һыу буйҙары, тау итәктәре, аулымдағы матур Йәнегет шишмәһе, аҡ ҡайынлы сауҡалыҡ, ҡарағайҙарым, ата-әсәйем, алты бала үҫкән йортом тураһында яҙам. Былар барыһы ла бәләкәй тыуған ил, йә булмаһа Атайсал тип атала. Бер бала саҡта әсәйем менән еләк йыйған матур йәй минең хәтирәмдә уйылып ҡалды. Йылдар үткәс, шул йәйҙәрҙе, әсәйемдең йәш саҡтарын, бала-сағымды һағынып шиғыр яҙҙым. АТАЙСАЛЫМ ЙӘЙҘӘРЕ Йәй, Һандуғас аҡланында, икәү Әсәй менән еләк тиргәйнек, Һыуһағанда минең устарыма Һутлы еләк йыйып биргәйне. Шул йәйҙәрҙә ул бит атайсалдың Барса йәмен һалды усыма. Ҡоштарымдың сут-сут һайрауҙарын Моңдаш итеп алдым юлыма. Телдәремдә ҡалды еләгенең Һутҡа тулып бешкән тәме лә, Әсәйемдең йәп-йәш сағы кеүек Йәйҙәр килде ергә йәмле лә. Көтә кеүек әсәй, еләк бешһә, Ҡайтыуымды тыуған яғыма: «Үҙ ереңдең йомшаҡ елдәре лә Һағыштарың баҫыр ял ғына». «Бештем», – тиеп, мине ҡаршы ала Еләктәрем һутҡа тулышып. Эй, шул саҡта була ҡағылғандай Әсәйемдең йылы һулышы. й.Нәсимә Ғайсина