Контрагы аз экен деп актёрлукка тапшыргам

Бала чагымда корунчаак, тартынчаак болуп бир рамкада калып калгам. Көпчүлүк мени менен мамиле деле кылчу эмес. Эми бул “мындай эле” да дешип мага көңүл деле бурушчу эмес. Жогорку окуу жайга окуу мага кыйын боло турганын билдим. Таятам ошол кезде төшөктө жатып калып үйдө аябай кыйынчылык болгон. Мен бери жакта унутулуп эле калып калдым, азык-түлүккө деле акча бере алышмак эмес. Ошону көрүп, окуй албайт окшоймун деп жүрдүм. Классташ кыздар окуу жайларды тандап жатышыптыр. Мен тандаган да эмесмин, мен тандабайм, азыр бир жерде идиш жууп иштеп турсам, кийин дагы “чоңураак” ишке кирип кетем деп ойлондум. Капыстан классташ кызымдын үйүнө барсам кагаздар жатыптыр. Арасында Искусство университетинин келишим акысы 9500 сом болчу. Эки-үч кыз болуп бардык, супсулуу кыздарым барган, алар окубай коюшту, мени тандап алышты.