Преподобная Мария,в иночестве Марфа Псковская,княгиня

Преподобней Марфе Псковстей Тропарь, глас 2. Благороднаго корене лозо избранная,/ в супружестве благочестно пожившая,/ и во иночестем чине Богу угодившая,/ благоверная княгине, преподобная мати Марфо,/ со святыми сродники твоими Христа Бога моли,// отечеству твоему в мире спастися. __ Кондак, глас 3. Явилася еси, преподобная Марфо,/ во граде Пскове верным отрада и утешение,/ добродетельми твоими образ спасения показующи,/ и молитвами помогающи,/ темже любовию вопием ти:/ радуйся, похвало благочестно в мире живущих,// и монашествующих удобрение. __ Величание Ублажа́ем тя,/ преподо́бная ма́ти Ма́рфо,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего. __ Молитва О преподобная княгине Марфо, прехвальная и добрая в женах, ты честнаго супружества образ в себе явивши, по земнем вдовстве Небесному Жениху уневестилася еси, и иноческим подвигом прилежала еси. Темже моли, всехвальная, Христа Бога, отечество наше в вере правой утвердити, святыя обители в мире сохранити, супругом любовь и согласие даровати, да кииждо в чине своем евангельски поживем, и вечнаго Царствия с тобою сподобимся, прославляюще в Троице славимаго Бога. Аминь.