КОРОБЕЙНИКОВСКАЯ-КАЗАНСКАЯ ИКОНА БОЖИЕЙ МАТЕРИ.

#Православие, #Христианство, #иконаБожиейМатери, #Богородица, #ПресвятаяБогородица, #чудотворнаяикона, #КоробейниковскаяКазанскаяиконаБожиейМатери, #КоробейниковскаяиконаБожиейМатери Тропарь: Яко заря всесветлая солнца правды незаходимаго возсияла икона Твоя, Богородице, шествующи в пределах Алтайских, храм веси Коробейниково озарила еси, тьму безбожия в земли нашей разгоняющи и верныя люди во Православии укрепляющи, ныне же молим Тя, Заступнице усердная, буди нам икона сия защитою от козней вражиих и залогом спасения душ наших. Молитва: О Пречистая Владычице Богородице, Царице Небеси и земли, вышшая ангел и архангел и всея твари честнейшая, Чистая Дево Марие, миру Благая Помощнице, и всем людем утверждение, и во всяких нуждах избавление! Призри и ныне, Госпоже Всемилостивая, на рабы Твоя, Тебе умиленною душею и сокрушенным сердцем молящияся, со слезами к Тебе припадающия и покланяющияся пречистому и цельбоносному образу Твоему и помощи и заступления Твоего просящия. О Всемилостивая и Премилосердная Дево Богородице Чистая! Воззри Госпоже, на люди Твоя: мы бо грешнии не имамы иныя помощи, разве Тебе и от Тебе рождшагося Христа Бога нашего. Ты еси заступница и предстательница наша, Ты еси обидимым защищение, скорбящим радование, сирым прибежище, вдовам хранительница, девам слава, плачущим веселие, больным посещение, немощным исцеление, грешным спасение. Сего ради, о Богомати, к Тебе прибегаем и на Твой пречистый образ с Предвечным на руку Твоею держимым Младенцем, Господем нашим Иисусом Христом взирающе, умиленное пение Тебе приносим и вопием: помилуй нас, Мати Божия, и прошение наше исполни, вся бо суть возможна ходатайству Твоему, яко Тебе слава подобает ныне и присно и во веки веков. Аминь. Величание: Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.