Мария Павлова дары блтт

Арвмæ урс-урсид бæлон куы стæхы, уымæй рæсугъддæр ма цы уа, зæгъы Мария. Ацы цъиуы фыццаг куы федта, уæдæй нырмæ бæлæттæ йæ зæрдæйы бацахстой арф бынат, зæгъы чызг. Историон цаутæм гæсгæ бæлон рагæй у сабырдзинад, сыгъдæгдзинад æмæ зæрдæрухсдзинады насан. Уæвгæ, Мария тынг уарзы истори, бакастис дæсгай чингуытæ. Бæлæттимæ баст цаутæ дæр бирæ зоны. Советон дуджы та бæлæттæ дарыны куыст бирæтæ кодтой. Ныртæккæ ахæм адæм стæм сты. Ацы бинонтæн сæ зæрдæмæ сæ архайд тынг цæуы. Марияйы фыды фыд дæр дис кæны, йæ кæстæрмæ ахæм фæндон кæй фæзынд, ууыл. Мария æппынæдзух кæсы чингуытæ, ахуыр кæны бæлæтты мыггæтæ, ацæуынц базармæ дæр æмæ та балхæнынц ног хуызтæ. Ацы мæргътыл чызг тынг узæлы. Алы бæлон дæр ын тынг хæстæг у. Ис сын хицæн бынæттæ, сæхи истори. Марияйы фæнды алы цъиуæн дæр ном раттын. Цæмæй сæм иу алы райсом куы бацæуа, уæд алкæмæ дæр сдзура йæ номæй, ацинтæ йыл кæны. Уæвгæ сæ алы райсом дæр æддæмæ рауадзы. Йæ фыды фыд та йын феххуыс кæны хæринаг раттынмæ. Мария ма сисы видеотæ дæр æмæ сæ равæры социалон хызæгты. Уым ын апарахат вæййынц. Дæсгай адæммæ дæр цымыдисаг кæсы Марияйы уарзон архайд. Чызг саразы æрфарсттæ дæр. Дзуры бæлæттæ дарыны лыстæгдзинæдтæ, æвдисы сæ йæхи дæнцæгыл. Адæмæн дæр сæ зæрдæмæ тынг цæуы Марияйы сыф. Ныффыссынц æм, цæмæй арæхдæр æвдиса йæ хæлæртты. Бинонтæ вæййынц Беслæны базары дæр. Уым æрæмбырд вæййынц мæргътæ уæйгæнджытæ Пятигорскæй æмæ æндæр рæттæй. Уым дæр фæнд кæны видеотæ исын, цæмæй йæ бафысджытæ цымыдисдæрæй кæсой йæ сыфмæ. Мах æрбацыдмæ дæр бæлæтты цынадтой, бахус сæ кодтой фенæй. Æмæ, æнæмæнг, уыцы хъуыддаг систой видеомæ. Марияйæн йæ бон сахатгай у бæлæттæм кæсын. Сæ рæсугъд тахт æй басабыр кæны æмæ йæ зæрдæ байдзаг вæййы цины æнкъарæнтæй.