Преподобная Матрона Хиосская,чудотворица

Преподобной Матроне Хиосской Тропа́рь, глас 3. Христо́вым стопа́м после́довавши,/ ми́ра кра́сная, преподо́бная, оста́вила еси,/ и подража́ла еси во пло́ти а́нгельское жи́тельство./ Те́мже Духа дарова́ньми о́стров Хи́ос просвети́ла еси,/ да́вший тя, всехва́льная,/ сего́ ра́ди согла́сно вопие́т ти:// ра́дуйся, Матро́но всеблаже́нная. Кондак, глас 3. Ника́коже естество́ же́нское/ препина́юще яви́ся, Матро́но,/ твои́м па́че челове́ка по́двигом вои́стинну и страда́нием./ Сего́ ра́ди посрами́ла еси́ высо́кий ум, богому́драя,/ и возвесели́ла еси́ вельми́ же́нский род,/ сла́бости того поноше́ние// побе́дами твои́ми отъя́вши. Величание Ублажа́ем тя,/ преподо́бная ма́ти Матро́но,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего. Молитва О, святая угодница Божия, преподобная мати Матроно! Призри милостиво твоим оком на нас, раб Божиих (имена), честной твоей иконе умильно молящиеся и просящие у тебе помощи и заступления. Простри ко Господу Богу нашему теплыя твоя молитвы и испроси душам нашим оставление прегрешений. Се бо мы сердцем сокрушенным, и духом смиренным тебе ходатаицу милостивую ко Владыце и молитвенницу за ны, грешныя, призываем, яко ты прияла еси от Него благодать молитися за ны и от бед избавляти. Тебе убо просим, не презри нас недостойных, молящихся тебе и твоей помощи требующих, и исходатайствуй всем вся ко спасению полезная, яко да твоими ко Господу Богу молитвами, получивши благодать и милость, прославим всех благих Источника и Дароподателя и Бога Единаго, в Троице Святей славимаго, Отца и Сына и Святаго Духа, ныне и присно и во веки веков. Аминь