Ինչպես հնդիկն ու չինացին չեն հոգնում իրենց հագուստը կրելուց, հայն էլ չպետք է հոգնի իր զարդանախշերից

Մենք գտնվում ենք մշակութային պատերազմում, որի միակ զենքը ուսումնասիրված և ապացուցված հայկականի ամրագրումն է։ Այս մասին Sputnik Արմենիայի հետ զրույցում ասում է «Տերյան մշակութային կենտրոնի» տնօրեն Լիլիթ Մելիքյանը։ «Անգամ Սովետական Միությունում, որն ինքնին գլոբալիզացման մոդել էր և միտված էր որոշ ազգային տեսակների համախմբմանը, իսկ մյուսների` դիմագծերը ջնջելուն, հայերին հաջողվում էր պահպանել իրենց ինքնությունը», - նշում է Մելիքյանն ու հավելում, որ մերօրյա մարտահրավերների համատեքստում ազգային գիտակցությունը պետք է հաղթի մեզանում առկա օտարասիրությանը։ Լիլիթ Մելիքյանին անկեղծորեն զարմացնում է, թե ինչպես կարելի է հոգնել ազգայինից, իսկ ստեղծված իրավիճակը նա դիտարկում որպես անպատասխանատու և իներտ ապրելու հետևանք։