Казанда Исламия Мәхмүтова белән хушлаштылар

4 декабрь татар җәмәгатьчелеге Тинчурин театры йолдызы, 55 ел гомерен шул театрга багышлаган Исламия Мәхмүтова белән хушлашты. Татарстанның халык артисты Исламия Мәхмүтова 3 декабрь көнне 76 яшендә каты авырудан соң вафат булды. Зал халык белән тулы иде. Бер сәгать барган хушлашу мәрасимендә түрәләр һәм иҗат әһелләре Исламия ханымның бар кешегә үрнәк булырлык, татар театрының кабатланмас зур шәхесе, якты, ачык йөзле кеше икәнен искә алдылар.