Фонд филиалĕ уçăлчĕ

«Çĕршыв хӳтĕлевçи» фонд Раççейре пĕрремĕш хут йĕркеленет. Ăна кĕске вăхăтра ĕçлеттерсе яраççĕ. Икĕ уйăх та çук, çĕршыври пур регионта та çу уйăхĕн 30-31-мĕшĕсенче патшалăх фончĕн филиалĕсем уçăлчĕç. 3 пин ытла социаллă координатор çĕртме уйăхĕн 1-мĕшĕнчен ĕçе пуçăнать. Чăваш Енре те юн кун ятарлă фондăн филиалĕ уçăлчĕ. Вăл Шупашкарти Мускав проспектĕнчи 3-мĕш çуртра вырнаçнă. Чăваш Енре ятарлă çар операцине хутшăнакансен çемйисене пулăшаççĕ-ха. Пĕлӳ çурчĕсенче салтаксен ачисем тӳлевсĕр апатланаççĕ, ача садне çӳренĕшĕн укçа тӳлемеççĕ, патшалăх вĕрентӳ учрежденисене черетсĕр вĕренме кĕртеççĕ, лагерьсенче канаççĕ тата ытти те. Ку фонд вара ятарлă çар операцине хутшăнакансемпе тĕллевлĕ ĕçлĕ. ЕЛЕНА ЗАЙЦЕВА: «Çар операцийĕнче хутшăнакан çамрăк ачасем каялла килсен çак ятарлă фондра вĕсене пулăшса тăрĕç. Кунта вĕсен медицина пулăшăвне илме май пулĕ. Кама кирлĕ – инвалидность йĕркелеме кунта пăхса тухĕç. Çакăнта вĕсем консультаци илме, ĕçе вырнаçма пултараççĕ. Унсăр пуçне кама социаллă пулăшу кирлĕ – кунта пирĕн патра юристсем те ĕçлеççĕ. Ятарлă тухтăрсем те килсе пулăшма пултарĕç». Салтаксене «пĕр чӳрече» мелпе пулăшу парĕç. Кунтах нумай функциллĕ центр уйрăмĕ, ĕçпе тивĕçтерекен центр, психологи пулăшăвĕ кӳрекен пӳлĕм, сывалма кирлĕ хатĕр-хĕтĕре тара паракан вырăн тата ытти те пулĕ. Ятарлă çар операцине хутшăнакан салтаксемпе вĕсен çемйисене пĕр вырăнтах кĕске вăхăтра тĕрлĕ пулăшу кӳреççĕ. ГАЛИНА: «Çак фондсем кирлех тесе шутлатăп. Ашшĕ-амăшĕсене, хăшĕ-пĕрисене йывăртарах килет, тен, арăмĕпе ачисене те психологи тĕлĕшĕнчен те калаçма кирлĕ пулĕ. Тăна кĕртекенсем, тĕрĕс сĕнÿ паракансем те кирлĕ». Патшлăх фончĕн филиалне уçнă çĕре Галина ывăлĕпе килнĕ. Ятарлă çар операцине «Çерçи» хушма ятпа хутшăнаканскер те кунашкал фонд усă панине калать. «Эпир çапăçу хирĕнче чухне çывăх çынсене пулăшаймастпăр-çке», – тет вăл. Салтак кану хыççăн каллех каялла каять. Амăшĕ çакна кирлĕ пек йышăнать. ГАЛИНА: «Ывăл мĕн шутлать, хăй мĕн тавассине, эпĕ ăна хирĕç каймастăп. Хăйĕнне хăех пĕлет. Эпĕ ăна яланах пулăшатăп. Çавăн пек шутлать пулсан – çавăн пек кирлĕ. Вăхăт çитсен каялла таврăнать. Хăвăртрах каялла таврăнасса анчах шанса тăратăп. Ывăл мобилизаципе шăнкăравласан тӳрех: «Каятăп, тарса пытанмастăп. Эпĕ ун пек пултараймастăп. Манăн каймалла», – терĕ». Кашни салтака, çемьене пăхса тăракан пулĕ. Çĕршывĕпе 3 000 ытла коордиантор ку енпе ятарлă пĕлӳ илнĕ. Чăваш Енри филиалра вĕсем 21-ĕн пулĕç.