#21 | Unha robótica sorpresa

Continuamos con esta traxectoria vertixinosa na gran teima de chegar a toda a xente posíbel e parece ser que cada día prodúcense novos síntomas de que as nosas fileiras comezan a expandirse, tanto é así, que xa hai quen ten a ousadía, o amor, ou a tolería de facer un traballo universitario sobre os mekemekes. En fin quizais dentro dun par de semanas xa non quede sitio en Ames Radio para meter ao todo mundo e teremos que coller algúns pisos de aluguer social para aloxar as nosas tropas. Neste programa Carlos vén aclarar o que aconteceu co que sería o noso primeiro show en directo falando dos Oscars, mais que non foi posíbel por varias razóns: unhas loxísticas e outra morais da que todo o mundo está ao tanto, porque foi imposíbel obviar o que pasou na última gala dos Oscars, xa non pola dubidosa calidade das cintas máis premiadas, senón polos momentos históricos que nos deixou, converténdose unha vez máis nunha celebración na que o verdadeiro cine queda cada vez está máis apartado. A parte disto, nun alarde inaudito de intelectualidade e boas maneiras, Carlos discerniu sobre a música de Rosalía e como a mesma Rosalía comparouna ca evolución que sufriu o logotipo de Lego ao longo do tempo. Xabi conquista e faise forte no núcleo do programa, para traer nunha auténtica manobra de ocupación mekemeke, unha robótica sorpresa que danzará polo estudo de Ames Radio creando o caos e favorecendo a pillaxe. Finalmente Miguel queda no ostracismo e sen minutos para desenvolver nada, polo que pechamos o programa falando con Aldara Palmeiro, a integrante máis vasca do grupo musical De Ninghures, composto por 8 persoas mozas de diferentes partes de Galiza que levan xa uns anos traendo aos escenarios unha música con grandes raíces na terra e unha forte pegada tradicional e que, agora, decidiron dar o paso de gravar o seu primeiro disco de estudo, e para elo abriron un crowfunding na plataforma Verkami, no que podes participar. Con Aldara e a música de De Ninghures despedímonos.