Предпразднство Рождества Христова

Канон предпразднства Рождества Христова Припев:Сла́ва Тебе́, Бо́же наш, сла́ва Тебе́. Глас 6. __ Тропарь предпразднства Рождества Христова , глас 4. Гото́вися, Вифлее́ме:/ отве́рзися всем Еде́ме,/ красу́йся, Евфра́фо,/ я́ко дре́во живота́ в верте́пе процвете́ от Де́вы:/ рай бо О́ноя чре́во яви́ся мы́сленный,/ в не́мже Боже́ственный сад,/ от него́же я́дше, жи́ви бу́дем,/ не я́коже Ада́м у́мрем.// Христо́с ражда́ется пре́жде па́дший возста́вити о́браз. __ Кондак предпразднства Рождества Христова , глас 3. Де́ва днесь Преве́чное Сло́во/ в верте́пе гряде́т роди́ти неизрече́нно;/ лику́й, вселе́нная, услы́шавши,/ просла́ви со А́нгелы и па́стырьми// хотя́щаго яви́тися Отроча́ Мла́до, Преве́чнаго Бо́га. __ Стихи́ра предпра́зднства Рождества́ Христо́ва, глас 6. Незаходи́мое Со́лнце/ из Де́вственных ложе́сн возсия́ти и́дет,/ просвети́ти всю подсо́лнечную,/ чи́стыми очесы́ и чи́стыми дея́ньми/ сре́сти сего́ потщи́мся/ и подъя́ти ны́не у гото́вимся ду́хом/ гряду́щаго во Своя́ стра́нным рождество́м, я́коже благоволи́,/ я́ко да устра́ншияся ны еде́мскаго жития́/ возведе́т, я́ко Благоутро́бен,/ в Вифлее́ме ражда́ется. __ Стихи́ра предпра́зднства Рождества́ Христо́ва, глас 6. Верте́пе,благоукраси́ся,/ А́гница бо гряде́т, чревонося́щи Христа́,/ я́сли же, подъими́те/ сло́вом разреши́вшаго от безслове́снаго дея́ния нас, земноро́дных./ Па́стырие, свиря́юще, свиде́тельствуйте чудеси́ стра́шному,/ и волсви́ от Перси́ды, зла́то, и лива́н, и сми́рну Царю́ принеси́те,/ я́ко яви́ся Госпо́дь из Де́вы Ма́тере./ Ему́же и, прини́кше, ра́бски Ма́ти поклони́ся/ и привеща́ше к держи́мому на объя́тиих Ея:/ ка́ко все́ялся еси́ Мне?/ Или́ ка́ко прозя́бл еси́ во Мне,/ Изба́вителю мой и Бо́же? __ Стихи́ра самогла́сная предпра́зднства Рождества́ Христо́ва, глас 2. Се́ вре́мя прибли́жися спасе́ния на́шего,/ гото́вися, верте́пе, Де́ва приближа́ется роди́ти,/ Вифлее́ме, земле́ Иу́дова, красу́йся и весели́ся,/ я́ко из тебе́ возсия́ Госпо́дь наш./ Услы́шите, го́ры, и хо́лми,/ и окре́стныя стра́ны Иуде́йския,/ я́ко гряде́т Христо́с,/ да спасе́т, его́же созда́, челове́ка,/ я́ко Человеколю́бец.